KOPOMODODIZAN DO DIKON - SEMINARIAN ANDY BORINE TINGADON OM SEMINARIAN ARTHUR JOHN DO DIOSIS SANDAKAN

Sinuatan di Evelyn Jock
Pinodahin doid boos Kadazan di Pilis Malim
Gambal naanu do SOCCOM / Puu Kosohimbaan Potihombus Marian

Sandakan - Iso kalamazan ditabantug kozo naazu id Panambazangan Tagazo St Mary. Ii hongkod panambazangan do Diosis Sandakan di ontok 24 January, 2021 id jam 9.30 doungosuvab. Ontok tadau di, naazu ii kopomododizan Dikon di duvo seminarian. Maza do Dikon no ih lahan tonudon do seminarian muzu kumaa kopomododizan do faado. Ii duvo Komuhakan minaan dodizo Dikon nopo nga ih Andy Borine Tingdon om Arthur John.

Diosis Sandakan id siibo do buuan di Rt. Rev Datuk Julius Dusin Gitom DD, minamalaii kopomododizan Dikon koingonom di 24 Januari, 2021, songian duvo komuhakan mantad kinoizonon posoihi dinadi do Dikon. Mantad kinotuidangan do Diosis Sandakan di toun 2007, 5 nodi kopomododizan Dikon do nakanjul; koiso di toun 2010 om vagu di toun 2015, 2016, 2019 (induvo) om baino id toun 2021. Sambayang kopomododizan Dikon di baino naazu doid kozuzuvo id kohudukan tu mogivad do toluo Pandemic. Tumanud di Kootulan Kapanaan Pointunud (SOP) montok lamai id Panambazangan id timpu kootulan mongipop kopamanaan (PKP), sambayang kopomododizan Dikon nopo di nga aanu  do paganakan om tuhun ngavi tumanud maza kosohimbaan potihombus.

Sominggu poguhu mantad Kopomododizan, di ontok 17 Januari 2021, duvo seminarian di inonuan do kapanaandakan koponoimaan sabaagi mononoimo montok pomuanan Tobitua. 

 Kapanaandakan Koponoimaan sabaagi Mononoimo montok Pomuanan Tobitua

Ontok kapanaandakan dii kopomododizan, seminaraian Andy om Arthur, hinohou ih ngaan dioho, om simba nodo pinopoimogon  do kinoikatan dioho. Poihoo nodi dii Rev. Fr. David ih Bishop Julius do ii duvo komuhakan dii kavasa maan dodizo do Dikon. Dadi Poboos nodi ih Bishop Julius do, humansan doid kahansanan pinoobi mantad Tuhan Kinoingan om ih Mononobus dotokou Jesus Kristus, duvo seminarian diti nopihi montok kobuanan sabaagi Dikon.

Likau no ih Duvo seminarian id doguvangan di Bishop Julius minabit  kopoobian do tongungan nagavi sabaagi Dikon. Kivaa nogi opod pinonguhot nung sumontob zioho mogovit diho tonggungan do Dikon, sumontob do popotazad do misterium kotumbazaan, tumimpoon do poingbihang, sumontob sambayang tikid tadau montok do tuhun Katolik om montok pomogunan om touvi nopo dii nga, nung mimagon zioho doid pamaamsi ih koomit di Kristus.

Mantad dii, Bishop Julius miampai duvo hongon disido minigit dii hongon dioho, miampai minuot nung kadandi zioho do mamantang om tumumbozo disido om sumovohi disido.

Suminingkotud  ih Andy om Arthur sabaagi kointahangan do kasagaan dioho tumaak doid pamaamasi montok kalaja do eklizia om vagu umivad doid pamaamasi tomod dioho montok Kristus.

Litani do Sangti, pinaazou di Dikon Stephen Esguerra, izanan mokianu sokodungan mantad di Sangti ngavi montok di Andy om Arthur mooi do kaanu tumanud disontob pinodandi dioho. Kaavi po oh Litani, miampai duvo pahad pinoigit di Bishop doid tuhu di Andy om Arthur, om sambayangai nodi disido dii sambayang kopomododizan Dikon.  

Songian nahapas kopomododizan dii, koduvo dioho pinotau sabaagi do Dikon, om guhi vagu tuminuubung dii Bishop Julius, singkotud no doid doguvang disido om igit no zosido dii Buuk Tobitua. Om poboos nodi ih Bishop Julius do “Toimoo iti Boos Tobitua di Kristus, ii pinopaabal do kinoikatan diozu, kotumbazaai no ngavi dii nobasa diozu, poabalo no ii kotumbazaan diozu, om tonudo no ih pinoia diozu."

 Dadi sahakai no ih Dikon Andy om Arthur kuminaa doid altar om panakadai no zosido dii Bishop Julius.

Miampai balakat do Kinoingan, kinopododizan do Dikon dii, noponu kolotian om agazo nopiangazan miampai avasi kinapanahon do pinanandakan dii. Kosohimbaan potihombus sambayang natanud do tuhun Katolik id savi-avi parish doid Disosis Sandakan om nogi id suvai Diosis. Paganakan om kinoluangan di Dikon Andy om Arthur doid Keningau, Beluran om Telupid nakatanud nogi do sambayang dii doid kosohimbaan potihombus.

Kounsikaan kumaa dii nadadi Dikon kavavagu, ih Andy om Arhtur. Kotohuadan dioho montok kalaja dosido tu iziho sabaagi saksi dotokou do hingkuo tokou do okodim minsomok di Jesus om sabaagi kukumalaja id kokuangan. Monongkotohuod tokou kumaa paganakan dioho ih pinopakavasa om minonaak sokodung poingponu montok pinomahaavan dioho do Kinoingan. Pason tokou dii au gigina kumaha dioho om gunoon nodaa do Tuhan izioho do gumampot dii kogumuan ngavi doid Diosis om pomogunan. 

“Ginovoo Tuhan Kinoingan sogonop ginavo nu, sogonop koduduvo nu om sogonop do pomuandaman nu” (Matius 22:37)

Seminarian Andy Borine Tingadon, 39, mantad uvang Beluran. Nosusu doid Kampong Bingkor, Keningau onto ko 6 April 1982 ih tanak komotohu doid puu panganakan 8 tuhun, mohoing disido ngoduvo om 6 miompinai. Mohoing kusai disido, nopinsin mantad di songuhun Miontong do nurse minghuda id Beluran di toun 2011 om zina disido nopo nga kalaja mitamong kootulan hamin sondii. Somok sohinaid timpu tomuhok di Andy do doiho id Beluran. Minugad isido Sikul Tosiibo doid Kadai Uvang Beluran (1989-1994), Sikul Menengah doid Kadai Urang Beluran (1995-1999) om nakaavi do Pangaan  k0 6 doiho id Seventh Day Adventist Secondary School, Tamparuli (2002-2003).

Ii Andy kiva do gaab om koloizan sondii miaga nogi dovokon, nga ih koloizan sumimba pamahaavan do Kinoingan ih tavakas no kozo. Tu nokito disido do okuang po oh Faado mantad Beluran sasabab no do okuang komuhakan dii kotumbozo do sumimba pomohaavan om vagu kogumuan do umat au otuzu mugad sambayang. Touvi podii om tanud no isido dii pomohaavan di ontok toun 2012.  Paganakan om kinoluangan minanaak sokodung montok pomohaavan disido om kopuiman nogi isido do ii vinakas disido  nokoikot mantad Kinoingan.

Andy minagavi 8 toun monginobos minghuda, doiho id seminary Kota Kinabalu (2 toun), om St Peter’s College Kuching, Sarawak (6 toun). Songian id toun pinghudaan disido, minoginobos isido do Buuk Tobitua, falsafah om teologi. Id sahom timpu disido doid seminary nopo nga  kaandaman kozo om suminonto isido doid pinghudaan ih noponu do koloizan. Nokopogovit vagu disido kumaa doid kinozonon dii aiso kahansanan disido do kougad om kosoomo do ogumu kinoluangan kavavagu. Andaman disido ih tadau di sogian isido poingkakat doguvang hamin CAC Kota Kinabalu, di songian kumoinsan nogi kougad isido do seminary sabaagi mokikiia, miampai minuot isido dioho sondii nung nokotunud ih haang do inanu disido. Sundung do ingkaa, kihansan isido do nunu ii minaan dau  okon nopo montok disido sondii nga montok nogi do savi-avi.

Pinghudaan ponompuanan disido doid mogisuvai-suvai paroki nakapanaak disido pomusaavan dii taahom doid ahal ngavi kogompit sabaagi faado. Iho no ii kiguno kozo montok popotounda disido do monompuan doid Diosis Sandakan. Oondos topuimanan disido do baino tu ogumu toihaan dau montok kalaja ponompuanan. Songian disido minugad doid toiso-iso paroki do Diosis Sandakan, nokito disido oh kavakasan om komungkangan. Tu kivaa mogikavo-kavo oh tinaau doid Diosis miampai mogisuvai-suvai koubasanan om natambaan vagu do tinau mantad suvai pogun. Iho nodi poogi do ogumu faado, sister, katikis om mohoingon gereja do gunoon, montok monuhung doid kotoinaan kotumbazaan do eklizia.

Topuimanan di Andy do kopomododizan Dikon id timpu pandemic miampai kotulan aiso kasagaan mimpanau nopo nga sabaagi iso balakat sabap kopokito iho do sundung potuu doid timpu komungkangan om koosizan, Tuhan Kinoingan tokou au minogizada do tuhun Disido. Okito tokou nogi ih Kinoingan manaak kosimbaan do hansan om sambayang dii tuhun Disido miampai minanaak do Diosis Sandakan 2 vagu tuhun nadadi do Dikon. Kahansanan Disido montok timpu mikot nopo nga kaanu oh eklizia sumungod do umat ngavi maza do kosohimbaan potihombus miaga doid youtube, facebook, twitter om suva po. Gereja apatut monoodo atag mamagazat do tuhun Katolik ngavi gumuhi mahik doid gereja songian katahib oh pandemic, mooi do au dii kohogos oh umat do humansan nopo do sambayang kosohimbaan potihombus.

Minongunsub isido do komuhakan Katolik sumimba pamahaavan do Kinongan doid koposizon dioho miampai pomuandaman om ginavo dii poingukab. Batos disido montok komuhakan do minggisom daa doid koginavaan dosido do Kinoingan om okon ko aahung do ahal ngavi dii doung pomogunan. Pinotahang disido do sundung potuu do pamahaavan do Kinoingan nopo nga koundoosi nogi ka disido, miaga dii Mokikiia di Jesus nga nokopuiman nogi do modosi om nokokinam mogidu, nga zosido nopo dii nga nopihi do Kinoingan do miaga di tu izioo nopo nga sabaagi saksi Disido. Montok komuhakan, pinotahang disido ih boos do Konoingan “Posuiboo ginavo nu, doid siibo do hongon tabantug do Kinoingan, mooi do poingkakaton ko Disido id timpu tavasi Disido. Pataako ngavi ih kosusaan nu kumaa Disido sabap oupus Isido diau.1 Peter 5:5-7 ” Touvi nopo dii nga, ii Andy suminambayang miampai pinopahabai do hansan disido do ogumu nodaa oh komuhakan mantad Diosis Sandakan oukab ginavo do sumimba  pamahaavan poinbida dii Kinoingan. Amen.

‘Om simbah no ih Yahweh, ‘Kada poboos do “tanak po izou”, tu apatut mugad ko kumaa doid diisai ii pinoatadan Ku diau om booson no do nunu ii pinonuhuan Ku diau’ (Jeremiah 1:7)

Seminarian Arthur John, 30, nosusu dii ko 20 Julai, 1991 doiho id Telupid. Isido ii tanak kumo-apat doid puu paganakan disido, ii iso paganakan dii duvo mohoing om 5 misangadi. Mohoing kusai disido, ii John Kisong mantad Kuala Sapi, ii songuhun nopinsin, om mohoing tondu disido, ii Nuini Tangkim, mantad Beaufort, kalaja kotoinaan do hamin sondii. Suminikul isido doid Sikul Tosiibo SK kadai uvang Telupid (1997-2002) om Sikul Pintangaan SMK kadai uvang Telupid nogi dii (2003-2009).

Ii Arthur nopo nga ogiot no haid doid aktiviti do gereja doiho id kinoizonon disido om mantad diho nodo nakaanu isido kounsuban suminimba pamahaavan dii Kinoingan do monompuan sabaagi faado. Mantad dii do minugad isido monginobos doiho seminary mantad Januari 2012 gisom Mei 2020, do mininggisom monginobos do boos Ongilis, Falsafah, Teologi om Buuk Tobitua do  doiho id Arch Diocesan Centre Kota kinabalu, St Peters College Major Seminary Kuching Sarawak. Dinadi isido do Lector dii ontok ko 3 November, 2016 om sabaagi Acolyte dii ko 3 November 2017.

Pinoboos vagu dii Arthur doid susuzan disido, ii sontob ngavi nopuimanan disido id sahom timpu pinggisaman monginobos minghuda doiho id seminary do agazo toomod oh kovosian. Aktiviti om program dii pinonuhuan ngavi minanaak disido kosivatan  minonguhan do kotumbazaan, kavo sabaagi tuhun om toihaan doid pomusaavan takavas ii kiguno mooi do kaanu isido tumimpoon poinggiot doid pinghudaan. Pinapoazou isido do Kinoingan dii sontob ngavi kotoinaan Disido doid poompus timpu ponginabasan om aktiviti spiritual.

Pinosunud disido do, dii ontok timpu minghuda isido doid ponompuanan, pinougad isido doid pipio paroki doid Sabah om Sarawak mantad 2014 gisom 2020. Pinghudaan dii minogovit disido kopoingatan dii kavo ngavi dii kokomoi ahal ponompuanan do tikid tadau. Minamung isido do mogisuvai-suvai ministry, om dii vookon nopo nga miaga Charismatic Renewal Movement, Legion of Mary, RCIA, Sarawak Mental house, Cheshire Home for the Disabled, Home for the aged, Youth Ministry Apostolate, Migrant Ministry om pinougad nogi isido doiho id Panambazangan Paitan. Oondos tomood ii Arthur do panon Catholic ih osompuu kozo om inonuan do kavasaan monuhung popobuu do Eklizia.

Ih topuimanan disido montok kopomododizan id saahom timpu pandemic nopo nga mositi do tumanud dii kootulan polinta mongipop do touluo diho om tomoimo mintamong do kabaakasan montok kovosian savi-avi ka disido. Sundung potuu okudi oh umat nokoundun do kopomododizan dii, nga otumbazaan isido do ogumu oh umat nakaanu tumanud maza kosohimbaan potihombus.

Minongunsub ih Arthur do komuhakan Katolik ngavi minggisom doid kotuhidan om au koosi suvaiko agazat do tumanud dii Jesus Kristus, Isai iih mitatamong dioho. Minamotos nogi isido do   komuhan ngavi do isai ih nokaambit pomahaavan montok ponompuanan do momizada dii koimaan ngavi dii kaahung om mugad soomo do faado paroki mokianu ponontudukan. Dumadi do faado kopoigovit maih diozu doid togumu ponginaman dii kalavong om mongunsub do pomusaavan dii taahom do maganu piangazan, om nung kopuiman izioho do pamahaavan do Kinoingan, iho no dati lahan dii montok dioho do vozoon.